見到呢個當值表係咪覺得好怪呢，明明當晚係我隊當九龍站車更，點解會有咁多字頭既師兄出現既？點解一晚車更都要搞到整個聯隊動員當值呢？

只因早前一隊之長以『本隊隊員大部份未曾接受足夠及適當的車更訓練』及『有隊員屢次報當車更之後，臨時因特別原因而缺席車更』等等理由，而無限期擱置車站當值，這措施導致五月的上水站當值需整個星期找友隊替更。到上個月尾(Jul08)，兩柴編更的派更電郵中，突然呼籲眾兄弟踴躍報這星期的九龍站車更，而且沒有講明報車更要求，變左導致當晚七十一車更容許搵一個只當了兩次車更並且乜都唔識的新師兄去當。

拿，咁就出左問題喇，呢頭話眾兄弟『未曾』接受足夠及適當車更訓練，果頭又死ngai 爛ngai 班兄弟當車更，一時間，眾兄弟一定會感到困惑：自己未有足夠適當訓練，甚至連AED都冇牌，咁自己可唔可以報車更呢？所以很多兄弟因為咁，會唔敢當車更。

還有再早一兩年前，一隊之長亦『反映』話個別喜歡當車更的兄弟，一星期車更裡面『霸』左幾晚黎當，令其他兄弟未能揀選合適日期及沒有機會報當車更，因此令有份報車更的兄弟都只敢報一兩晚，唔敢報太多，費事又比一隊之長抽稱。

因為這些種種原因，所以呢個星期有幾晚都要搵聯隊內其餘三隊分擔車更，亦導致當晚的車更有齊聯隊內四隊兄弟當值。