Í tilefni þess að vinur okkar, Ríkarður Már Pétursson, sem starfar í El Salvador um þessar mundir, fékk stutt frí frá erlinum suðurfrá, var ákveðið að efna til hópferðar á Vatnajökul með vinum hans og skyldmennum. Fórum 28 manns á 14 bílum, en höfðum vit á að splitta hópnum strax í upphafi. Um helmingur fór í Hrauneyjar á föstudagskvöldi og restin í Jökulheima. Laugardagurinn rann up fagur og bjartur. Á jökli var þó engu að síður blint alla leið á fjallið. Við eyddum deginum á fjallinu í rólegheitum, margir fóru í gufu. Það var arfarok og 15 stiga gaddur á Grímsfjalli en á sunnudagsmorgni var frostið komið niður í um 8 gráður en nokkuð blint. Fljótlega eftir að ekið var niður af fjallinu áleiðis heim birti til og endaði í glaðasólskini. Gaddurinn lét þó engan bilbug á sér finna. Komum við í Þórðarhyrnu og Pálsfjalli á leið heim. Myndir tóku ýmsir úr hópnum auk Bolla. Efst á skjánum hægra megin er hægt að velja skyggnusýningu á öllum myndum þessa safns. Hér er myndband / video Georgs Aspelund frá ferðinni.