Hljómsveitin Blek og bytta var boðuð í félagsheimilið í Trékyllisvík um verslunarmannahelgina 2010. Ekki var um annað að ræða en mæta, dansa og klappa í kór - enda Rikki búinn að lýsa komandi fjöri. Við fjölskyldan drifum okkur af stað á fimmtudegi og eftir endalausa tölvupósta og sms-skeyti til Beggu, Arnar, Ingós og Margrétar Helgu féllust þau loks á að koma líka og eru vonandi ekki svikin af ferðalaginu. Fórum nokkrum sinnum í sund, þar sem strákarnir (og Örn) syntu líka í sjónum (myndir klúðruðust), ókum til Ingólfsfjarðar og Ófeigsfjarðar, við Margrét Helga skokkuðum á Krossnesfjall daginn eftir ball (meðan aðrir sváfu) og svo framvegis. Mæli með því að Blek og bytta sé elt á röndum!

Í Ingólfsfirði var okkur tjáð að nú hefðu eigendur húsakosts á staðnum fengið styrk frá Húsfriðunarsjóði til að hefja framkvæmdir sem miða að því að varðveita síldarverksmiðjuna og nálæg hús. Því hefur verið spreyjað í grafitistíl á húsin "hús í einkaeigu, aðgangur bannaður" og er þetta með eindæmum ósmekklega gert. Fallegra hefði verið að reka niður staur framan við húsin og tréplötu þar ofan á með skrifuðum texta á blað með plasti yfir. En nú er búið að spreyja með vegavinnuspreyi á bert og veðrað timbrið og steinsteypuna. Ég skil ekki hvað eigendur voru að hugsa.