Skruppum félagarnir Rikki og Siggi um Fljótshlíð í Strútsskála við Skófluklif laugardaginn 8. apríl. Veðrið var óviðjafnanlegt en það vakti þó athygli okkar að allan daginn heyrðist ekki múkk í nokkrum manni á vhf. Það var eins og að vera einn í heiminum. Við vorum þó ekki fyrr komnir í skála en tilkynnt var um slys vélsleðamanns í nágrenninu, sem þyrlan sótti svo um eftirmiðdaginn.

Færið var fínt alla leið í skála, en eftir á að hyggja hefði, sökum veðurblíðu, verið skemmtilegra að fara um Eyjafjallajökul, Fimmvörðuháls og áfram niður af jökli við Mælifellssand. Það ætluðum við hins vegar að gera daginn eftir, en þá var skyggnið ekkert á jökli. Fórum þó yfir jökul og niður við hann sunnanverðan. Á jökli ókum við fram á mannlausan bíl. Færið á jökli var gríðarlega erfitt, mikill foksnjór sem ekkert þjappaðist, vorum í 3 pundum og siluðumst áfram með allt læst hægar en þótt fótgangandi hefði verið. Á varla að segja frá því en vorum 4 tíma milli skála.