Að venju eyddi vinahópurinn páskunum í Húsafelli. Það er einhver værð að komast á hópinn og verður honum sjálfsagt að fjörtjóni einn daginn ef heldur fram sem horfir. Þó tókst mér að vígja Lúxann með stæl við húsdyrnar á skálanum í Þjófakróki. Var svo upptekinn við samræður við konuna að ég ók rakleitt í fjólubláan krapa á síðustu metrunum og þurfti tvo bíla tengda spili auk 44" Patrols með 6,5 lítra brjálæðingi til að tosa okkur upp. Kann ég bæði Hjalta, fyrir að festa stuðarann almennilega, og spottaframleiðendum bestu þakkir fyrir úrvals vinnubrögð auk ökumanna bjargvættanna fyrir hjálpina. Og svo ekki orð um það meir, gildir um þig líka Rikki Lagos!