Árleg sumarferð okkar Bíparanna lá að þessu sinni norður og austur og síðan niður. Mér telst til að í ferðinni hafi verið eknir amk 2100 km. Við fórum frá höfuðborginni til Húseyjar í Skagafirði, þaðan til Dags og Helgu, vina okkar í Fljótum sem sýndu okkur sveitina sína (kafarar: það er steinsteypt félagsheimili á kafi í Stífluvatni), þaðan héldum við áfram um Lágheiði til Húsavíkur. Þar fórum við út að borða og gistum. Síðan héldum við (í grófum dráttum) áfram um Melrakkasléttu, um Kópasker og Raufarhöfn og áfram til Þórshafnar og til Ytra Lóns á Langanesi. Þar gistum við í góðu yfirlæti í tvær nætur. Fórum út á Font, komum við í Skálum og á Heiðarfjalli. Síðan héldum við til Bakkagerðis, þar sem við áðum í þrjár nætur, tvískiptur hópur, hvor á sínum stað. Ferðinni lauk við Káraknjúkastíflu föstudaginn 23. júlí. Myndir tóku Bolli, Skúli, Hrafnhildur, Jón og Sibba.