Þessi leið er tilvalinn sunnudagsbíltúr fyrir Sunnlendinga. Ekið er austur á Hvolsvöll og þaðan hjá Njálsbúð og Bergþórshvoli og síðan suður slóða, þar sem stendur Hallgeirsey, Kross og Gularás. Eftir honum er ekið þar til komið er að vegamótum til hægri við skilti þar sem stendur Hallgeirseyjarfjara. Sá slóði er ekinn til Krosssandsfjöru á Landeyjasandi. Á þessu svæði er talsvert um uppgræðslutilraunir eins og sjá má á heyrúllum, sem eru að finna víða á sandinum.

Um svæðið segir m.a. í svari við fyrirspurn á Vísindavefnum: 'Þykkastur er Landeyjasandur í Vestur-Landeyjum þar sem hann nær 260 m niður fyrir sjávarmál, en þynnist þaðan til austurs og vesturs — er víða 60-70 m þykkur. Skeiðarársandur virðist vera um 200 m þar sem hann er þykkastur, en sennilega kringum 100 m þykkur að meðaltali. Þótt hér sé um mikið rúmmál að ræða — sem allt hefur myndast eftir ísöld, á síðustu 10.000 árum eða svo — er það ekki nema lítið brot af því sem árnar hafa í rauninni borið fram, því mestur hlutinn berst út í hafsauga með hafstraumum.'

Í þessu albúmi er tveimur ferðum blandað saman, annars vegar ferð okkar feðga 12. maí og hins vegar ferð með Arctic Trucks þann 19. maí. Í báðum ferðum var ekið með sjónum nánast allt til Markarfljóts en beygt af áður við vatnsdælustöðina til Vestmannaeyja og ekið upp með Bakkaflugvelli uppá þjóðveg aftur. Þaðan var haldið austur fyrir Skóga og að Douglas DC3 flaki Bandaríkjahers á Sólheimasandi, þaðan sem ekið er til vesturs með sjónum, yfir Jökulsá á Sólheimasandi (Fúlalæk) og áfram að Skógá en með henni er haldið upp á Þjóðveg.

Þessi leið er tilvalinn sunnudagsbíltúr fyrir þá sem eru á jeppa með háu og lágu drifi, en ég mæli síður með því að hún sé farin einbíla á óbreyttum jeppa og alls ekki jepplingi vegna þess hve sandurinn er sums staðar gljúpur, einkum þegar komið er að Krosssandi þar sem auðvelt er að festa sig.