Bjarney og Sigurgeir, foreldrar móðurömmu minnar, Völu, bjuggu á Sólgötu 7 á Ísafirði (áður Steypuhúsgötu því við götuna var fyrsta steinsteypta hús þorpsins byggt). Bjarney var frá Kroppsstöðum í Skálavík, Sigurgeir, langafi, frá Gjörvudal í Íafjarðardjúpi. Fyrsta myndin er af fjölskyldunni, langafa og langömmu með barnaskarann sinn. Safnið sýnir einnig ungu hjónin ömmu Völu og afa Kjartan Reyni, stýrimann sem 23ja ára fórst með togaranum Apríl skammt suður af landinu þann 1. desember 1930. Þá var Addý mamma aðeins 6 mánaða gömul og amma ófrísk af tvíburunum Valborgu og Kjartani Reyni Pétri. Amma giftist aftur mörgum árum síðar, Ólafi Halldórssyni frá Varmá, lengi leigubílstjóri á BSR. Þau eignuðust tvær dætur, Erlu Ólöfu og Halldóru Þorbjörgu (Dóru). Þau bjuggu allan sinn búskap á Bragagötu 25, þar sem ég var leiguliði í rúman áratug. Við amma Vala fórum stundum saman í bíó, gjarnan Austurbæjarbíó, einu sinni óvart á ljósbláa mynd í Háskólabíó með skólafélögum mínum í MH. Þá hnussaði í ömmu þótt hún hefði gaman af.

Föðurætt Addýar mynduðu Pétur Sigurðsson, smiður og sjómaður frá Vallá á Kjalarnesi, og Guðrún Gróa Jónsdóttir (f. 1879 eða 1880) frá Miðdalskoti í Laugardal austan Laugarvatns. (Foreldrar hennar voru Jón Jón Halldórsson frá Miðdalskoti og Guðrún Nikulásdóttir frá Hraunkoti í Grímsnesi) Pétur og Gróa bjuggu á Vesturgötu 51a í Reykjavík. Það var gjarnan haft í flimtingum að langafi væri alveg eins og Jósef Stalín í útliti. Nokkuð til í því. Kjartan Reynir Pétursson var eitt barna Gróu og Péturs sem amma Vala giftist og átti með þrjú börn, Ásdísi Guðrúnu (Addý) og tvíburana Valborgu og Kjartan Reyni Pétur. Kjartan Reynir eldri var háseti á Apríl er hann sökk 30. desember 1930. Hann var þá aðeins 23. ára. Þá stóð amma Vala uppi ekkja með Addý, sex mánaða gamla, og ófrísk af tvíburunum. Í kjölfarið fór Addý í fóstur til föðurömmu sinnar og afa á Vesturgötu. Meyja, föðursystir hennar var þá í foreldrahúsum. Hún giftist síðar Jóni Bogasyni bryta á Dettifossi. Þau bjuggu við Hávallagötu 51. Til þeirra fluttust Gróa og Pétur með mömmu. Pétur lést 1939 og Jón Bogason fórst með Dettifossi í febrúar 1945. Búskapur Meyju, Gróu og mömmu stóð áfram við Hávallagötu eftir að Meyja varð ekkja. Kjörsonur Meyju var Ólafur Þ. Jónsson, Óli kommi, lengi vitavörður í Hornbjargsvita í Látravík á Ströndum, og var hann uppeldisbróðir Addýar. Meyja lést í janúar 1962 og amma Gróa á Grund 1971. Addý lést 1. júlí 1999.