Árlegt ferðalag vinanna lét ekki á sér standa þrátt fyrir forföll. Í ár var dvalið á Lambanes-Reykjum í Fljótum. Á rúmri viku gerðum við það okkur helst til dundurs að fara á árlegt hippaball í Ketilási, ganga Botnaleið úr Flótum til Siglufjarðar, skoða helstu menningarstofnanir Siglufjarðar, hjóla til Haganesvíkur, hjóla hringinn svokallaða, frá Lambanes-Reykjum um Lágheiði til Ólafsfjarðar, áfram um Héðinsfjörð til Siglufjarðar og þaðan áfram um Strákagöng og Almenninga til Lambanes-Reykja. Einnig ókum við fyrsta bílveginn sem gerður var til Siglufjarðar úr Fljótum (ágætur vegur sem er vel við haldið). Síðan lögðust konurnar til sunds í Miklavatni ásamt ungpiltunum, eitt kvöldið var ákveðið að athuga með fisk í Miklavatni en sú tilraun tók fljótlega enda enda mætti veiðivörðurinn óðar á svæðið. Það var í góðu lagi enda var þetta tímaeyðsla. Það var grillað, legið í pottinum, sötrað á víni og veislumatur gerður hvert einasta kvöld. Aðeins eitt kvöld sem allir létu aðra stjana við sig, það var á veitingahúsi á Sigló. Að lokum: Siglufjörður hefur tekið slíkum stakkaskiptum frá því fyrir örfáum árum að maður trúir því ekki. Mikið mannlíf, fallegur bær.

Á e. að fá fl. myndir.