Hér er um tilvalda dagleið að ræða fyrir þá sem hafa áhuga á Reykjanesi, þar sem fleira leynist en margur heldur. Þar eru til að mynda leifar a.m.k. þriggja flugvéla frá því á árum heimstyrjaldarinnar síðari; öll í og við Fagradalsfjall. Ein þessara flugvéla, B25 sprengjuflugvél Bandaríkjahers, fórst í Kastinu í Fagradalsfjalli með 15 manns innaborðs. Aðeins stélmaðurinn lifði af slysið. Meðal þeirra er fórst var generáll Frank Maxwell Andrews sem sagt er að hafi átt að fara fyrir herjum bandamanna við innrásina í Normandí. Í hans stað fór Eisenhower fyrir herjunum og má því segja að Kastið sé mikilvægur skurðpunktur í mankynssögunni, en eins og allir vita varð Eisenhower stríðshetja og (því) loks forseti Bandaríkjanna. Þess má geta að stélmaðurinn, sem lifði af, hélt áfram störfum um borð í annarri vél. Sú vél fórst einnig og aftur lifði hann af.

Ekið er um Grindavík og þaðan inn á veg 427 með suðurströndinni. Á uppbyggðum vegi á leið niður lítils háttar brekku, skammt utan Grindavíkur, er beygt af veginum til vinstri og er nokkuð snúið að komast inná slóðann sem þar hefst undir brekkunni. Leiðin er fremur grýtt og víða torfarin og má því segja að hún henti alls ekki nema breyttum bílum (33" og stærri) sem fara með hálfum loftþrýstingi mýkstum lófa um slóðina þar sem hún liggur um gróinn jarðveg. Frá slóðinni er svo gengið á fjallið að flökunum. Komið er inná veg 427 aftur skammt austar. Alls tekur ferðalagið um 8 klst frá Reykjavík til Reykjavíkur.