Við Jón Svanþórs, Skúli og Bessi, Jón Sverrir og Þóra slógumst í för með félögum okkar í Skeljungsgrúppunni svokölluðu í þeirra árlegu haustferð. Hjónin Bjössi Erlings og Jóna voru búin að skipuleggja allt að vanda og taka til kvöldsteikina á laugardagskvöldinu. Fórum í Nýjadal á föstudagskvöld. Á laugardegi fórum við norðurfyrir Tungnafellsjökul að fossinum Gjallanda og áfram hjá Fossaleiti og yfir Gjóstuklif í Valafelli yfir í Vonarskarð (e. Bárðargötu). Þaðan áfram hjá Snapadal, suður með Köldukvíslarjökli til Jökulheima þar sem við gistum. Á sunnudeginum fórum við yfir Tungnaá og með Tungnaárjökli að upptökum Skaftár undir Skaftárjökli, þaðan áfram hjá Fljótsodda uppá Tröllhamar, þaðan með Blæng og Miklafelli og Þverárdal og út á Þjóðveg 1 við Orustuhól, skammt frá afleggjara til Brunasands. Þetta var einstaklega vel heppnuð ferð. Vorum í blankalogni allan tímann en um 8-10 stiga frosti, í hvínandi norðurljósum í Nýjadal og alls herjar jólasnjókomu í Jökulheimum. En alltaf í blankalogni. Myndir Bjössa og Jónu eru hér. Einnig er ástæða til að benda gestum síðunnar á ágætan pistil Soffíu Sigurðardóttur um tillögu stjórnar Vatnajökulsþjóðgarðs um lokun Vonarskarðs, sem hún segir óskiljanlega.Myndir annarra en Bolla eru merktar sérstaklega. Sjá einnig stutt myndband frá Skúla.