Í mars 2001 héldum við nokkrir félagar á sex bílum austur á Hérað í þeim erindum að snúa við og halda til baka - ekki þó alveg sömu leið! Sumir gistu á Hunkubökkum á leið austur en aðrir óku í einum rikk. Á fimmtudagskvöldi vorum við viðstaddir stofnun Austurlandsdeildar Ferðaklúbbsins 4x4 en snemma morguns föstudaginn 23. mars var haldið af stað. Leiðin lá út Fljótsdal að austanverðu og síðan upp á veginn sem liggur til Snæfells. Við vörðuna Sigþór var eldsneytiskálfur skilinn eftir og haldið í átt til Þrándarjökuls. Vegna mikillar muggu og lélegs skyggnis var hætt við jökulferð að sinni og haldið í fyrsta náttstað, Egilssel við Kollumúla. Á laugardagsmorgni var skíðadrífa og með ólíkindum hversu miklum snjó hafði kygnt niður um nóttina. Leið okkar lá nú í Vatnshlíðar og Marköldu og síðan á Eyjabakka og í Geldingafell við rætur Eyjabakkajökuls. Áfram var haldið, upp á Eyjabakkajökul, litið við í íshelli við Hnútulón, og síðan áfram í annan og frægari við rætur Brúarjökuls og loks í náttstað í Snæfelli. Á sunnudagsmorgni hafði veðrið heldur betur tekið stakkaskiptum. Nú var glampandi sól, logn og heiðskírt. Ekið var áleiðis í vestur yfir Jökulsá á Dal með viðkomu í Sauðárkofa. Stefnan var tekin á Kringilsárrana, komið við hjá Töfrafossi milli jökulsánna tveggja; á Dal og Fjöllum og síðan stefnt á Gæsavötn. Á leið okkar komum við í Grágæsardal og Hvannalindum og kvöddum leiðsögumann okkar, Þórhall Þorsteinsson, við Krepputungur. Þaðan lá leið okkar í skálann í Gæsavötnum. Morguninn eftir hélt hópurinn af stað aftur, nú í Nýjadal, þar sem komin var ausandi stórhríð. Við veltum fyrir okkur að gista en þar sem gamli skálinn þótti ekki of vistlegur var ákveðið að halda áfram í engu skyggni. Leiðin lá í Versali og áfram til Hrauneyja, þangað sem komið var um kl. 21, eftir um 12 tíma akstur frá Gæsavötnum. Þar kvaddist hópurinn og hélt af stað heim til Höfuðborgarinnar. Allar myndir eru Ragnars Th. Sigurðssonar.