Meðfylgjandi myndir eru úr tveimur ferðum á vegum Arctic Trucks með 'óvana' ökumenn á óbreyttum jeppum og jepplingum, þar sem meginmarkmiðið hefur verið að gefa fólki kost á að kynnast bílnum sínum við aðrar en venjulegar aðstæður, beitingu jeppans/jepplingsins, drifbúnaði bílsins í reynd, og getu, og hvernig ekið er í ám, í snjó, af hverju lofti er hleypt úr dekkjum og hvernig drifgetan breytist o.sfrv.
Í fyrri ferðinni, sem farin var seint í september, lék allt í lyndi hvað færi varðar. Þátttakendur kynntust fyrst og fremst átökum við ár og mismunandi brekkur.

Í seinni ferðinni fengu þátttakendur að finna til tevatsins því allnokkuð var í Gilsá/Markarfljóti og skammt ofan Bólstaðar á Einhyrningsflötum tók snjórinn við og ofan við Mosa varð færið ófært óbreyttum bílum. Þrátt fyrir að við kæmumst ekki fyrirhugaða hringferð vegna meiri snjávar en vér ætluðum, þá var dagurinn engu að síður krefjandi á sína vísu. Niðurgrafnir vegir (þessir yndislegu íslensku fjallvegir sem vonandi verða aldrei bættir) voru sléttfullir og brattar brekkur skoruðu okkur á hólm. Við sannreyndum hvernig drifgeta batnar í réttur hlutfalli við minnkandi loftþrýsting, sannreyndum einnig að bílar velta ekki við að halla lítið eitt (!) (þeim má halla meira en ætla mætti) og sáum líka að hægt er að snúa við á ótrúlega litlum fleti.